Tæp 80% þjóðarinnar telja að leggja eigi mikla áherslu á byggingu húsnæðis á vegum óhagnaðardrifinna félaga á næstu árum.
Þetta kemur fram í nýrri þjóðmálakönnun sem Gallup framkvæmdi fyrir Alþýðusamband Íslands (ASÍ).
Spurt var: Hversu mikla eða litla áherslu telur þú að leggja eigi á byggingu húsnæðis á vegum óhagnaðardrifinna félaga á næstu árum?
Alls kvaðst 41% aðspurða telja að leggja ætti mjög mikla áherslu á byggingu slíks húsnæðis og 37% sögðu að leggja bæri á hana frekar mikla áherslu.
Einungis 8% töldu að leggja bæri frekar (3%) eða mjög litla (5%) áherslu á byggingu húsnæðis á vegum óhagnaðardrifinna félaga.
Þá tóku 14% ekki beina afstöðu.
Andstaða við áherslu á byggingu húsnæðis á vegum óhagnaðardrifinna félaga er mest meðal kjósenda Sjálfstæðisflokksins (24%) og Miðflokksins (19%).
Könnunin var gerð 13.-21. nóvember 2024.
Úrtak var 1.697 manns af öllu landinu, 18 ára og eldri, handahófsvaldir úr Viðhorfahópi Gallup.