![Asi Merki 2024](https://www.asi.is/media/318502/asi-merki-2024.jpg?width=760)
Við gerð kjarasamninga í desember 2022 fengu aðilar vinnumarkaðarins aðkomu að starfshópi innviðaráðherra sem hafði starfað frá því um sumarið og vann að endurskoðun húsaleigulaga með það að markmiði að bæta réttarstöðu og húsnæðisöryggi leigjenda. Sú vinna tók mið af umfangsmikilli vinnu fjölmargra aðila undir forræði innviðaráðuneytisins sem teygir sig allt aftur til ársbyrjunar 2019.
Starfshópurinn skilaði einróma niðurstöðu í skilabréfi sínu til innviðaráðherra dags. 14.7.2023. Niðurstaða hópsins var málamiðlun andstæðra sjónarmiða en í nefndinni sátu bæði fulltrúar launafólks og atvinnurekenda. Að mati Alþýðusambandsins hefði þurft að ganga lengra en féllst þó á að um mikilvægan áfangasigur væri að ræða. Með breytingunum myndi réttarstaða leigjenda færast nær því sem þekkist í nágrannalöndum.
Í aðdraganda kjarasamninganna sem undirritaðir voru í mars lagði verkalýðshreyfingin áherslu á að þessi hluti málsins yrði kláraður enda komið að lokapunkti nokkurra ára umfangsmikillar vinnu. Aðgerðir á húsnæðismarkaði þola ekki frekari bið og breyting á húsalögum er einn af nokkrum lykilþáttum í að tryggja heilbrigðari húsnæðismarkað. Ekkert fer á milli mála að loforð og yfirlýsingar um að bæta húsnæðisöryggi og réttarstöðu leigjenda eru tilvísun í umrætt frumvarp, sem þá var reiðubúið og afrakstur langrar og vandaðrar vinnu aðila vinnumarkaðarins og stjórnvalda.
Alþýðusamband Íslands skorar á stjórnvöld að efna gefin loforð og afgreiða breytingar á húsaleigulögum fyrir þinglok.